طريقة الاستعمال

1الدخول

1. افتح https://madah.net/app من موبايلك.
2. اكتب رقم موبايلك وكلمة السر اللي وصلتك منا.
3. أول ما تدخل، غيّر كلمة السر من القائمة ☰ ← كلمة السر.

2الشاشة الرئيسية

فوق بتشوف ملخص شغلك. اكبس على أي وحدة منهم لتشوف طلباتها بس، واكبس مرة ثانية لترجع للكل:

• متأخر: طلبات موعدها راح وما خلصت. باللون الأحمر.
• مستحق اليوم: لازم تتسلّم اليوم.
• جاهز للاستلام: خلصت وبتستنى الزبون.
• د.أ متبقي: مجموع المصاري الباقية على الزباين.

تحتها في بحث بالاسم أو رقم التلفون أو رقم الطلب، وتبويبات: الكل، جديد، قيد التنفيذ، جاهز، تم التسليم.

كل طلب بيطلع بشكل تذكرة، ورقمه على الطرف:

الطرف الأحمر يعني الطلب متأخر.

3تسجيل طلب جديد

1. اكبس الزر الأصفر تحت: طلب جديد
2. اكتب اسم الزبون. إذا كان زبون قديم، بيطلعلك اسمه وبتختاره.
3. اكتب رقم تلفونه. مهم عشان رسائل الواتساب.
4. اكتب شو الطلب: مثلاً «500 كرت شخصي وجهين».
5. اكتب المبلغ الكلي والعربون إذا دفع.
6. اختار موعد التسليم: اليوم، غداً، بعد يومين، بعد أسبوع، أو اختار التاريخ والساعة.
7. اكبس حفظ الطلب. الطلب بياخذ رقم لحاله.

بعد الحفظ بيطلعلك زر «إرسال تأكيد الطلب». اكبسه وبيفتح واتساب برسالة فيها رقم الطلب والموعد.

4تغيير حالة الطلب

اكبس على أي طلب ليفتح، وفوق بتلاقي مراحل الطلب. اكبس على المرحلة اللي وصلها:

• جديد: استلمت الطلب.
• قيد التنفيذ: بلّشت تشتغل عليه.
• جاهز: خلص. بيطلعلك زر «إرسال الطلب جاهز» لتبلّغ الزبون.
• تم التسليم: الزبون استلم.

من نفس الصفحة بتقدر تعدّل الطلب أو تلغيه. وتحت في «سجل الطلب» بتشوف كل شي صار عليه ومين عمله.

5الدفعات

1. افتح الطلب، وانزل لقسم الحساب: بتشوف الإجمالي والمدفوع والمتبقي.
2. اختار طريقة الدفع: كاش، كليك، بطاقة، أو غير ذلك.
3. اكتب المبلغ واكبس تسجيل دفعة، أو اكبس تسديد المتبقي كاملاً.

النظام ما بيقبل دفعة أكثر من المتبقي، فما في غلط بالحساب.

6رسائل واتساب

بكل طلب في 3 رسائل جاهزة: تأكيد الطلب، الطلب جاهز، وتذكير بالمتبقي. بتكبس وحدة، وبيفتح واتساب والرسالة مكتوبة، وإنت بتكبس «إرسال».

الرسالة بتنبعت من رقمك إنت، والنظام ما بيبعت إشي لحاله. وفي كمان زر اتصال وزر محادثة واتساب عادية.

7لصاحب المحل بس

من القائمة ☰ فوق. (قسم الزبائن بيشوفه الكل: كل زبون وطلباته، وقديش دفع، وقديش باقي عليه.)

• التقارير: طلبات الشهر، قديش قبضت، قديش باقي، والمتأخر، ويوم بيوم.
• الإعدادات والموظفين:
  • اسم المحل ولونه.
  • تعديل نص رسائل الواتساب. الكلمات بين القوسين مثل {الاسم} بتتعبّى لحالها.
  • إضافة موظف: اسمه ورقمه، وبتطلعله كلمة سر تبعتها إله.
  • إيقاف موظف، أو عمل كلمة سر جديدة إله إذا نسيها.

8نصائح لأول أسبوع

• سجّل كل طلب لحظة ما تستلمه، حتى الصغير.
• دايماً اكتب رقم تلفون الزبون، عشان الواتساب.
• أول الدوام، اكبس «متأخر» و«مستحق اليوم» وشوف شو لازم يخلص.
• آخر الدوام، اكبس «د.أ متبقي» وشوف مين باقي عليه، وابعتله تذكير.
• بدك تتدرب قبل؟ افتح النسخة التجريبية والعب فيها براحتك.